Chapèla di SS. Bastian e Fabian
Chapèla di SS. Bastian e Fabian
-
Comuna e Valada
LA MARMO - Val Maira
-
Tròba la glèisa
-
Escòuta l'audio
Lo tresòr de Joan Baleison
La pichòta glèisa dediaa ai Sants Bastian e Fabian remonta al 1450 e es un di caps d’òbra dal pintre demontés Joan Baleison. Formaa originariament da un local solèt embè vòuta a botala e absida semicircolara, en lo XVIII sècle venon jontaas la sacrestia e una navada novèla, chambiant decò l’orientament. De fòra, embè lo pichòt cloquièr a vèla, son visibles en façada lhi rests des pinturas a fresc del Quatre Cents: rapresenton Sant Bernard da Mentona embè lo diaol a la cheina e Sant Cristòfo.
Original e enteressant l’esfond, embè de botegas artisanas medievalas; al centre, bèla si eslavaa, se reconeis lo Criste embè lhi instruments del trabalh del mestre da bòsc.
Dins l’absida son plaçats lo Criste en glòria, la Madòna en tròn embè lo Pichòt entre Sant Constanç e Sant Fabian; dapè lhi Evangelistas, en chamin a escriure lors Evangelis.
L’arc trionfal es ocupat da l’Anonciacion, e sus la vòuta se tròbon episòdis de la Vita de Criste e de Sant Bastian: Sant Policarp que batea lhi joves Marc e Marcelin; Bastian que confessa a Dioclecian d’èsser cristian; lo sant judicat da l’imperator; lo martiri embè las flèchas e lo còrp del Sant retrobat dins la cloaca maxima de Roma entè era estat campat per mespretz.
Al centre del registre sobeiran son rapresentaas la Nativitat e l’Adoracion di Tres Reis. La nativitat es originala per la presença de la levatritz Zachele que lava lo pichòt dins una bacina entre la Vierge engenolhaa e Sant Jusep. Lo registre sotan rapresenta l’Escapada en Egipte, embè lo miracol del gran, episòdi tirat da lhi Evangelis apòcrifs. Al temp de l’escapada la Sacra Familha, cerchant de salvar lo Pichòt da Eròd, rescontra un lauraire en chamin a semenar.
La Vierge lhi di que seria passat quarqu’un a demandar de lor e lo prega de dir la veritat; après lhi di de prener lo dalh.
Lo lauraire, estonat perquè a just finit de semenar, obedìs, e per miracol lo gran creis e es prest per èsser meissonat. Ai soldats que demandon quora es passaa la familha, lo lauraire respond lo ver: son passats lo jorn qu’a semenaa. Segurs d’èsser tròp en retard, lhi soldats d’Eròd se retiron. La scèna d’après rapresenta Eròd que comanda de maçar lhi innocents.
Mistà si muove